傳道者講：空虛的空虛，空虛的空虛，凡事攏是空虛。
人一切的著磨，就是伊佇日光的下面所著磨的，有甚麼利益啊？
一代過去，閣一代來，總是地猶原佇啲。
日出，日落，緊緊走倒轉伊所出來的所在。
風吹向南，閣倒轉向北，轉踅無息，也倒轉佇伊轉踅的圈。
江河攏流落海，總是海也無滿；江河流到叨落，就閣流到遐。
萬事勞苦到極，人講袂盡。目睭看，看不飽；耳孔聽，聽不淀。
所欲有的是前已經有；所欲做的是前已經做。
佇日光的下面無有新的事。
豈有甚麼事人通指伊講你看此個是新的？
佇咱以前的世代，早早已經有啦。
已經過的世代，無人記得；將來的世代，後來的人也袂記得。《傳道書第1章節選》
